«Өч ел балабыз булмады»: Чәчкә кызына ни өчен Весна дип исем кушканын әйтте
Хәзер бәбигә өч яшь тә алты ай булды инде.
Җырчы Чәчкә кызына Весна дип исем кушкан иде. Аны тәнкыйтьләүчеләр шактый булды. Хәзер җырчы бу сүзләргә нокта куярга тели. Бу турыда ул инстаграмдагы сәхифәсендә язды.
«Кызым Веснага өч яшь тә алты ай. Менә инде өч ел да алты ай буена миңа интернетта кайбер кешеләр төрле тәнкыйть сүзләре яза. «Исеммени ул?», «Рус исеме кушкансың, татар исеме беткәнме әллә?», «Бестолковые родители», «Тилеме әллә син?», «Балаңа мәктәптә авыр булачак», «Балаң бу исем белән бәхетле булмаячак» һ.б.
Туктагыз! Сез Аллаһ Тәгаләдән узып, ничек шундый сүз яза аласыз соң? Кеше турында юньләп бернәрсә дә белмичә, нахак сүзләр яудыру дөресме соң?
Мин 28 яшемдә кияүгә чыктым. Тормыш иптәшем Ирек белән тормыш итә башладык. Бергә концертлар куеп, банкетлар эшли идек. Бар да яхшы. Ләкин балабыз юк. Баштарак ул сизелмәде, чаптык та чаптык. Эш аты кебек үзем рульдә, үзем концертлар куям, ирем оештыра, туй-юбилейларны бергә алып барабыз. Ә күңел буш, эчемдә нидер җитми.
Чын хатын-кыз, ана булып камилләшмәвем минем йөрәгемне үтә әрнетә иде. «Хатын-кызның бөтен матурлыгы ана булуда», - дип юкка гына язмаганнар бит.
Болай да ярама тоз салучылар күп булды. Алар инде якын кешеләр — туганнар, таныш-белешләр. «Бәби юкмы соң әле?», «Картаясың бит, бала кирәк», «Табибка барып күренегез».
Әлегә юк, дип әйтә идем. Ә эчтән ничек үксегәнемне белсәгез. Күпме төннәр мендәргә елап уздырганымны беркем белми бит. Аллаһтан ялварып-ялварып сорый идем. Ирем гел тынычландыра иде. «Балабыз булмаса да, ярар, син минем кызым булырсың», - дип шаяртып, күңелне күтәрергә тырыша иде.
Өч ел балабыз булмады. Өч елдан тест ике сызык күрсәтте. Ышанмадым!
Авырга узганымны белгәч, артык сөенергә куркып йөрдем. Шуннан минем бәхетле көннәрем башланды.
2016 елның август аенда кызым дөньяга килде. Хисләремнең ничек ташып акканын сүз белән генә әйтеп аңлата алмыйм. Рәхмәт Раббыма!
Весна дип, ирем белән алдан сөйләшеп куйган исемне бирдем. Ни өчен Весна, диярсез. Чөнки шушы балам — минем язым, хатын-кыз буларак чәчәк аттырган җимешем, мине яшәрткән һәм яшәткән иң зур бәхетем!
Бала тудыру йортыннан чыгып бераз вакыт үткәч, мәчеткә барып исем куштырдык — чын мөселман исемен! Тик ул исемне мин, иң якын кешеләремнән кала, бер кешегә дә әйтмәдем. Әйтмәячәкмен дә! Минем моңа, әни кеше буларак, хакым бар дип уйлыйм. Калган барлык кешеләр өчен кызымның бары Весна исеме белән генә калуын теләдем, күз тимәсенгә дә яхшы булыр дидем.
Барысын да аңлаешлы итеп яздым, дип уйлыйм. Миңа, гаиләмә, балама карата бүтән андый теләсә нинди начар комментарийлар язуыгызны туктатыгыз! Миннән курыкмасагыз, Аллаhтан куркыгыз!
Арагызда, бәлки, мине аңлаучылар да булыр, рәхмәт сезгә. Барыбызның да балалары сау-сәламәт, бәхетле-тәүфыйклы булсын иде. Балалары булмаудан үзәкләре өзелгән хатын-кызларга мин чын күңелемнән ана булу бәхетен телим. Иншаллаh! Үз вакыты белән булыр барысы да. Өметегезне өзмәгез», — дип яза җырчы.
Чәчкәнең инстадуслары сәламәтлек һәм бәхет тели. Арада берәү тагын исемгә күчеп, «Язгөл ди кушсагыз да ярый», - ди. Тик башкалар аны туктата, Чәчкәнең сүзләрен хуплыйлар. «Дөрес язгансың», - диләр.