Өч бала анасы Казаннан авылга кайтып барышлый юл һәлакәтендә үлгән

27 сентябрьгә каршы төндә Чистай янында юл һәлакәтендә өч бала анасы үлгән. Бу турыда «Наш Черемшан» сайты хәбәр итте.

42 яшьлек Наилә Талипова Казаннан Чирмешәнгә кайтып бара торган булган. Ул Әмир авылында яшәгән. Чыгышы белән Лашман авылыннан булган. Өч бала анасы Казанга эш белән барган, диелгән әлеге хәбәрдә.

Наилә Кәлимулловна кадетлар мәктәп-интернатында эшләгән. Һәлакәткә очраган машинада ул пассажир утыргычында булган. Мәрхүмәнең өч баласы ятим калган.

Район басмасы Наилә ханымның ире Әнәс Рөстәмовичның, балаларының, туганнарының кайгысын уртаклашкан.