Чаллының Үзәк районы башлыгы Камчаткада чаңгы ярышында вафат булган - видео
61 яшьлек Искәндәр Галимов чаңгы марафонында катнашкан булган.
Чаллының Үзәк районы башлыгы Искәндәр Галимов Камчаткада чаңгы марафонын узганда вафат булган. Бу хакта «Челнинские известия» хәбәр итә.
Ул трассаның якынча 40 километрын узган, аннан соң хәле начарланган. Башка спортчылар ярдәм чакырган. Галимовны спорт комплексына алып кайтканнар. Анда көтеп торган медицина хезмәткәрләре үлемен генә раслый алган.
Ярышларны оештыручылар биргән мәгълүмат буенча, Галимовның ярышта катнашу өчен белешмәсе булган. Аны Чаллының бер сырхауханәсе биргән. 61 яшьлек чаңгычы старт алдыннан хәле начар булуга зарланмаган.
Искәндәр Галимов 2012 елда Чаллының Үзәк районы җитәкчесе итеп билгеләнгән. Ул вазифага кадәр шәһәрнең башкарма комитеты аппаратын җитәкләгән.