Бөрҗән районында катамаранда йөзгән Чаллы кешесе батып үлгән, дип хәбәр итә Башкортстан буенча гадәттән тыш хәлләр министрлыгы идарәсе.
Җирле хакимият, яңгырлар явып Агыйделнең суы күтәрелү сәбәпле, кисәтү чыгара – елгага кермәскә киңәш итә. Әмма, кисәтүгә карамастан, 35 кеше елгада көймә, катамараннарда йөзәргә уйлый.
Чаллыдан килгән 50 яшьлек ир Зур амфитеатр кыясы янында суга сумкасын төшереп җибәрә. Шуны алам дип үрелеп, ул үзе дә суга егылып төшә. Коткару жилеты булмаган ир шунда ук төпкә дә китә.
Хәзер туристның мәетен водолазлар эзли.
