Чаллыда яшәүче Екатерина Орлова 12нче баласын табарга Аргентинага киткән. Аның башка балалары Чаллыда, Петербургта, Мәскәүдә туган. Бу турыда «Татарстан 24» хәбәр итә.
Хәзер ул 12нче баласын Буэнос-Айреска барып тапкан. Малайга Матвей дип кушканнар.
«Августта тагын бер бала табасын белгәч, иремә шундый фикер килде. Башта «бу – фантастика» дип уйлаган идем, сүзләренә ышанмадым. Соңрак ачыкланганча, бу кызыклы вариант булып чыкты. Аргентинада туган балага җир хокукы буенча гражданлык бирелә. Ул Россия һәм Аргентина гражданины була», – ди Екатерина.
Аргентина паспорты белән йөздән артык илгә визасыз барып була. Бөтен гаилә белән күченүгә килгәндә, Орловлар өчен бу сорау ачык кала. Кайсыбер илләрдә социаль ярдәм бик югары дәрәҗәдә, ди Андрей Орлов.
Күп балалы бу гаилә Чаллыда арендаланган фатирда яши. Алар үз торакларына сертификат ала алмый икән.
«Мин аерым бүлмә телим, сеңелләрем, энеләрем белән бер бүлмәдә кысан», – ди Дарья исемле кызлары.
Хәзер балалар әниләре һәм кече энеләре кайтуын көтә. Әлегә төгәл вакыты билгеле түгел. Екатерина сүзләренчә, Буэнос-Айреста чакта, ул күпне күргән, күпне белгән. Россия, Колумбия, Венесуэла, Бразилия һәм Норвегия кешеләре белән танышкан.