Чаллыда яшәүче 75 яшьлек бабай фәхишә өчен 15 мең түләгән (фахишә ялган булып чыккан)

Чаллыда яшәүче 75 яшьлек ир-ат фәхишә алам дип алданган. Бабай интим хезмәт күрсәтү турында белдерү тапкан һәм 12:30 сәгатькә өенә шәп кыз чакырткан. Фахишәне 15 мең ярым дип бәяләгәннәр, бабай пенсиясеннән шушы акчаны кызганмый түләгән, дип яза «Челнинские известия».

Тәгаенләнгән вакытка «асыл» кыз килмәгәннән соң да әле бабай 40 минут көтә, аннары полиция бүлегенә шикаять итә. Анда бабайның акчаны Казандагы фахишәгә түгел, Ростов өлкәсендә теркәлгән телефонга күчерүен ачыклыйлар.

Бабайга исә үзенең мондый хәлдә калган бердәнбер кеше түгеллеген белеп юанырга гына кала. Чаллыда яшәүче һәм беркайда да эшләмәүче 29 яшьлек ир-егет тә шундый ук хәлдә кала. Егет бабайга караганда саграк була, ул интим хезмәт белән бик озаклап нечкәлекләрне ачыклый, аннары мобиль кушымта аша «досуг фирмасы» счетына 13 мең акча күчерә. Фатирында кунакны кичке 8дән төнге 11гә кадәр көтә, ләкин беркем дә килми. Егет полиция бүлегенә гариза язган. Аның белән сөйләшкән абонентларның номерлары Волгоград, Воронеж һәм Ульяновск өлкәләрендә теркәлгән булуы ачыклана.

Әлеге фактлар буенча «Мошенниклык» маддәсе нигезендә җинаять эшләре ачылган. Полиция бабайны алдаган мошенникны табачакмы, тапкан очракта бабайга алынмый калган хезмәтне натуралатамы, акчалатамы түләтәчәкләре язылмаган.