Чаллыда «Яңарыш»* экстремистик оешмасы координаторы Зиннур Әһлиуллинны кулга алганнар

Чаллыда «Яңарыш Татар Халык Партиясе»* (*РФ территориясендә эшчәнлеге тыелган экстремистик оешма) экстремистик оешмасы координаторы, 73 яшьлек Зиннур Әһлиуллинны сак астына алганнар.

«KazanFirst» чыганагы мәгълүматлары буенча, Әһлиуллинга карата «Нәфрәт яки дошманлык уяту, шулай ук кешенең дәрәҗәсен кимсетү» маддәсе буенча җинаять эше кузгатылган. Әһлиуллинның өендә тентүләр узган, тыелган экстремистик әдәбият (берничә китап) алынган.

«Яңарыш» экстремистик хәрәкәтенә Зиннур Әһлиуллин 1 ел чамасы элек кергән дип хәбәр ителә, хәбәрдән күренгәнчә, ул аның актив катнашучысы һәм координаторы булган. Шул вакыт эчендә ул үз тирәсенә 3 егетне җыйган. Аларның берсе – 11нче сыйныф укучысы Марат. Укучы терактлар эшләүгә, көч структураларына һөҗүм итәргә, ут төртергә чакырган мәгълүмати канал булдырган, диелә. Ул шулай ук Татарстанның Россиядән аерылуын өндәп чыгыш ясауда гаепләнә.

Зиннур Әһлиуллин берничә мәртәбә көч структуралары хезмәткәрләре игътибарына эләккән иде инде. 1993 елда аңа Җинаять кодексының берьюлы берничә маддәсе буенча гаепләү белдерелгән иде. Шул исәптән массакүләм тәртипсезлекләр оештырган, корал йөрткәне һәм дәүләткә каршы пропаганда өчен. Хокук органнары хәбәрләренә караганда, Әһлиуллин хокук сакчыларына һөҗүм иткән, аларны чылбыр белән кыйнаган.

2012 елда «органнар» Әһлиуллин белән яңадан кызыксына башлый. Ул бу юлы «нәфрәт яки дошманлык уяткан, шулай ук кешелек дәрәҗәсен түбәнсеткән өчен» шикләнелә. Әһлиуллин, дошманлык уяткан өчен, берничә тапкыр административ җаваплылыкка да тартылган булган.

Ул моңа кадәр шартлы рәвештә хөкем ителгән иде инде.

«Яңарыш Татар Халык Партиясе»* экстремистик оешмасын АКШта яшәүче Иршат Хәбиев җитәкли. Зиннур Әһлиуллин анда координатор һәм активист, булып санала, дип яза басма. Хәбиев сепаратизмга һәм Татарстандагы вазгыятьне тотрыксызландыруга юнәлдерелгән яшерен эшчәнлек оештыруда гаепләнелә. Хәрәкәт лидеры Хәбиевнең Россиядә төрле җинаять маддәләре буенча, шул исәптән корал әйләнеше һәм ялган документлар өчен берничә тапкыр җаваплылыкка тартылганы билгеле. Хәбиев 2019 елда АКШка эмиграциягә киткән.

Зиннур Әһлиуллин 1987 елда Чаллы шәһәрендә берничә кеше белән бергә татар милли хәрәкәтенең оешу эшен башлап җибәрә. 1990 елның августында Чаллыда сәяси ачлык оештыра.