Кичә Чаллыда 47 нче комплекста подъезд янында эскәмиядә утырган ир-атка ут капкан. «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсендә сөйләүләренчә, ир-ат тәмәке тотып эскәмиядә йоклап киткән, ул киемнәренең яна башлавын тиз генә абайламаган да.
Бу хәлне күреп алучылар ялкынны кул астында булган әйберләр белән сүндерә. Ир-атның тәненең 40 проценты пешкән. Хәзер ул Чаллыдагы Ашыгыч медицина ярдәме хастаханәсендә.
«Татар-информ» хәбәр иткәнчә, ир-ат үзе генә булмаган, ләкин дусты аның яна башлавын күрә торып, тыныч кына китеп барган.
Табиблар ир-атның хәлен авыр дип бәяли, диелә хәбәрдә.