Чаллыда парковкадагы машиналар түбәсеннән сикереп йөрүче егетне видеога төшергәннәр
видеодан скриншот
Чаллыда парковкада торган машиналарның түбәсенә басып сикереп йөрүче егетне видеога төшереп алганнар. Бу кадрларны «Татарстан 24» каналы күрсәтте.
Күрше йортларда яшәүчеләр әлеге вакыйга кадрларын социаль челтәрләрдә тараткан.
Егет бер машина түбәсеннән икенчесенә сикерә-сикерә бара. Ул узган саен, машиналарның сигнализациясе эшли башлый.
Шаһитлар сүзләренчә, биредә йөрүче яшьләр исерек була.
Социаль челтәр кулланучылар бу хәлгә ачулана. «Яшьләрнең намусы юк, тотсалар, әти-әниләре түлисе була бит», – диләр.