Чаллыда мумиягә әверелгән хатын-кыз мәете табылган
Ул чама белән бер ел элек вафат булган дип фаразлыйлар.
Чаллыда прокуратураның махсус боерыгы буенча коткаручылар бер фатирның ишеген ачып кергән. Фатир эчендә 76 яшьлек хуҗабикәнең мәете табылган. Бу турыда "Челнинские известия" хәбәр итте.
Мәеттә көч кулланып үтерү билгеләре булмый. Ул чама белән бер ел элек үлгән дип фаразлыйлар.
Әлеге хатынның юкка чыгуын озак вакыт беркем дә сизмәгән. Әле күптән түгел генә социаль хезмәткәрләр борчылу белдергән. Алар пенсионер хатынның инде күптән пенсиясен алмавын ачыклаган.
Башта әби озакка берәр кая киткән дип уйлаганнар. Күршеләре дә берни әйтә алмаган. Шуннан соң социаль хезмәт прокуратурага мөрәҗәгать итеп, чит кеше торагына керергә рөхсәт сораган, диелә хәбәрдә.