Чаллыда көнче егет элек бергә яшәгән хатынының язышкан хатларын укыган. Хәзер аны суд хөкем итәчәк. Бу турыда, шәһәр судының матбугат хезмәтенә сылтама белән, «Челнинские известия» хәбәр итте.
Эш материаллары буенча, элек бергә яшәгән егет белән кыз машина салонында утыра. Егет кызның телефонын сорый, кыз бирми. Аннары егет телефонны тартып ала. Ләкин телефонда пароль була, егет аны карый алмый.
Соңрак егет аңлатканча, парольне вату өчен, ул сим-картаны тартып чыгара һәм үз телефонына куя. Аннары «Телеграм» каналда кызның шәхси хәбәрләрен укый.
«Хат язышу, телефоннан сөйләшү, почта, телеграф яки башка хәбәрләр серен бозу» маддәсе буенча җинаять эше ачыла һәм егет гаепле дип табыла. Ул үзе дә гаебен кире какмый. Хәзер бу кешегә дәүләт хисабына 10 мең сум штраф түләргә кирәк була, диелә хәбәрдә.