.Чаллыдагы «Яблочко» бакчачылык ширкәтендә яшәүче ир-ат 30 сутый җирендә 13 кабан дуңгызы, 12 кәҗә, күркәләр, тавыклар һәм эт асрый. Күршеләре бу ир-аттан зарлана, хайваннар аларның уңышына да зыян китерә икән. Бу турыда «Татарстан 24» каналы хәбәр итте
«Алар уңышны кабаннар ашауга зарлана. Хайваннар койма аша да узып керә, астан казыйлар яки ничектер өстән керәләр, уңышны бетерәләр», – ди Элеонора Гомәрова.
Фәргать Хәсәнов исемле ир-ат сүзләренчә, санитария нормалары үтәлә, аның тирәсендәге күршеләр каршы түгел, хәтта имзалары да бар.
«Мин 12 мең сум пенсия алам, гомер буе эшләдем, хәзер дә яшәргә тырышам, шуңа күрә хайваннар тотам, бакча үстерәм. Тирес бакчага китә, күршеләр дә сорый. Хайваннар чиста, ис юк», – ди хуҗа кеше.
Ширкәт рәисе һәм бакчачылар бу проблеманы хәл итәргә тырыша. Алар экологларга, участковыйга мөрәҗәгать иткән. Прокуратурага һәм Тукай районының баш ветеринарына да шикаять язганнар.
«Койма бар, ләкин ул таләпләргә туры килми. Өстәвенә хайваннар иректә йөри, бу катгый тыела. Алар ябык бинада булырга тиеш», – ди Тукай районының баш ветеринары Ленар Хәйбуллин.
Хайваннарның инвентаре дә эшкәртелергә тиеш. Бакчачы бу кагыйдә бозуларны төзәтергә тиеш. Ширкәт рәисе белән очрашу вакытында хайваннар хуҗасы шарт куйган. Ул урамда асфальт юл ясасалар, хайваннар асрауны туктатачагын ышандыра, диелә хәбәрдә.