Чаллының 2 нче хастаханәсендә эшләүче реаниматолог Марат Альмакаев төнлә Казаннан Анталиягә оча торган самолетта хәле начарланган пассажирга медицина ярдәме күрсәткән. Бу турыда «Горздрав Челны» телеграм-каналы хәбәр итә.
Самолет күтәрелгәннән соң 1 сәгать үткәч, пассажирның хәле киткән. Очкыч капитаны тавыш көчәйткеч аша табиб ярдәме кирәклеген белдерә. Марат Альмакаев йоклаган булган.
«Мин хатын-кыз тавышы ишеттем. «Иремә ярдәм кирәк!» – дип кычкырды. Стюардессалар җыелган урынга килдем. Урта яшьтәге ир-атны күрдем, ул агарынган, тирә-юньдәгеләргә җавап бирми иде. Кан басымы төшкән, брадикардия башлаган. Ир-ат аңын югалта башлады», – дип сөйләгән табиб.
Реаниматолог сәбәбен аңлаган һәм бу кешегә ярдәм күрсәтә башлаган. 10 минуттан соң пассажир аңына килгән, кан басымы нормальләшкән, йөзе алсуланган, сөйләшә башлаган.
Соңрак билгеле булганча, ир-атның йөрәге хәлсез, чөнки 2017 елда ул миокард инфаркты кичергән. Табиб стюардессалардан пассажирга каты баллы чәй китерүне сораган.
Фото: © «Горздрав Челны» телеграм-каналыннан