Чаллының мәгълүмати сәясәт идарәсе җитәкчесе Римма Мөхәммәтҗанова үз үрнәгендә туй оештыру тәҗрибәсе белән бүлешкән. Бу хакта ул үзенең телеграм-каналында язган, дип хәбәр итә «Челнинские известия» газетасы.
Искәртеп үтик, мэрның матбугат сәркатибе узган атнада кияүгә чыкты.
Римма Мөхәммәтҗановадан киңәшләр:
1. Профессионаллар белән эшләгез – фото-видеога төшерү, ризык әзерләү, бизәү, киендерү һәм алып баручы – профессионал булсын.
2. Фотога төшү өчен яхшы локация сайларга кирәк, никахны теркәгәнче һәм аннан соң фотога төшегез.
3. Фотосессиягә рилсмейкер чакырыгыз. Берьюлы ике куянның койрыгын тотачаксыз.
4. Тиз генә капкалап алыр өчен җиңелчә ризык, мәсәлән, балалар пюресы алыгыз.
5. Мессенджерда кунаклар өчен гомуми чат булдырыгыз һәм бөтен оештыру мәсьәләләрен шунда языгыз.
6. Туйга чакыруны видео форматында ясарга була – кәгазь дә, акча да янга кала.
7. Туйдан соң беренче кич өчен кунакханәдә номер алыгыз.
8. Ресторан өчен яңа образ – башка киемнәр алып барыгыз.
Ә кәләш букеты аерым игътибарга лаек. Мэрның матбугат сәркатибе моның өчен бодай башаклары сайлаган.
«Җиләк җыярга баргач, кырда бодай күрдек, бераз җыярга булдык. Соңыннан «Кәләш букетын шундый итеп ясасак?» дигән фикер килде. Мәгънәсе тирән: икмәк – бар нәрсәгә баш, җир, туган як. Матур да. Соңыннан Chanel брендының да соңгы туй коллекциясендә кәләшләр бодай башакларыннан ясалган букетлар белән чыкканын белдек. Безнең бу матурлык белән бүлешәсе килде һәм һәр өстәлгә 33 башактан кечкенә букетлар ясап куйдык, ә соңыннан кунаклар аны бүләк буларак алып кайтып китте», – дигән Римма Мөхәммәтҗанова.
Ире Михаил Римманы, бик оста оештыручы, дип атаган һәм, туй идеаль узды, дигән. Бәйрәмне шәһәрдәге бер ресторанда уздырганнар, Татарстанның атказанган артисты Илнур Гомәров, җыры Илзирә Ибраһимова, тамада Ренат Галиев һәм гитарачы Дамир Гаффаров кунакларның күңелен ачкан. Бәйрәмнең рәсми булмаган өлешен алып баручы Артур Королев җитәкләгән.