Парикмахерлар чал кергән чәчләрне тәрбияләүдәге хаталарны әйткән. Бу турыда Лента ру яза.
Агарган чәчләрне 8-10 атнага бер тапкыр кисәргә кирәк. Кисмәсәң, ак чәчләр сына, коры була, бөдрәләнә башлый.
«Агарган чәчләр каты структуралы була, аларны еш прическа итеп ясап йөрү киптерә, тагын да ныграк бөдрәләтә», – дигән белгеч.
Тагын бер хата – чал чәчләрне артык еш юу. Еш югач, баш тиресенең табигый майлары бетә, алар чәчләрне сәламәт итү һәм саклау өчен кирәк. Шуңа күрә атнасына 2-3 тапкырдан артык юмау хәерле.
Чәчне агрессив компонентлары булмаган шампунь белән юу хәерле. Стилист сүзләренчә, шәмәхә пигментлы шампунь алыгыз. Ул чал чәчнең саргаюын булдырмый. Зәңгәр төсмерле шампунь чәч бөртекләрен көпшәкләндерә.
Шулай ук кондиционерны да дөрес сайлау кирәк. «Мәсәлән, каты һәм бөдрәләнеп торган чәчләр тыңлаучан булсын өчен – дымландыра торган кондиционер, ә сирәк чәчләрне куеландыру өчен, күләм бирә торган кондиционер кирәк», – ди белгечләр.
«Стайлинг чараларын күп кулланганда, детокс-шампунь куллану кирәк. Ул баш тиресен стайлинг – прическа ясый торган чаралардан чистарта. Моны өйдә үзең эшләргә була – шампуньга бераз аш содасы салып җибәрегез», – ди стилист.