Япония галимнәре ачыклаганча, чәчнең кәүсә күзәнәкләрендә ДНК зарарлану картаю процессына һәм тире рагы килеп чыгу куркынычына турыдан-туры йогынты ясый. Бу хакта тикшеренүгә сылтама белән Nikkei басмасы хәбәр итә, дип яза «Radio1.ru».
Белгечләр мәгълүматларына караганда, чәч фолликулаларында урнашкан кәүсә күзәнәкләр даими рәвештә яңарып тора. Әмма стресс йогынтысында алар үлә башлый – бу чәч агаруга китерә. Мондый процесс организмга күзәнәкләрдән алар мутацияләнгәнче һәм яман шешкә әйләнгәнче котылырга ярдәм итә.
Тикшеренүчеләр билгеләп үткәнчә, тәмәке төтене, янган газлар һәм смог йогынтысы кәүсә күзәнәкләренең «үзеннән-үзе юкка чыгу» сәләтен киметә, бу – онкология булу куркынычын арттыра. Шулай итеп, чәч агару организмның рактан саклану механизмы булырга мөмкин, диелә хәбәрдә.
