Чабаксарда башлангыч класслар укытучысы үзе эшләгән мәктәпне яндырмакчы булган
Чабаксарда башлангыч сыйныфлар укытучысы 10нчы мәктәпкә ут төртмәкче булган. Бу хатын-кыз 2 кабинетка ут төрткән. Мәктәп сакчысы моны күреп ала һәм полиция чакырта. Шәһәрнең Мәгариф идарәсендә бу хәл турында төгәлрәк сөйләделәр, дип яза «PRO Город» порталы.
Бу хәл 28 гыйнварда була. Идарәнең матбугат хезмәте мәгълүматлары буенча, укытучы мошенниклар тәэсиренә эләккән, акчасын югалткан һәм классны яндырырга уйлаган. Мәктәп милкенә зыян килмәгән, ә педагогны тоткарлаганнар.
Хәзерге вакытта хокук саклау органнары тикшерү уздыра.
«Мәктәп эше штат режимында бара. Иминлек мәсьәләсе махсус контрольдә, балаларга куркыныч янамый. Мәгариф идарәсендә белем бирү оешмалары җитәкчеләре белән мошенниклыкны кисәтү буенча эшне көчәйтү турында киңәшмә уздыру планлаштырыла», – диелә хәбәрдә.