Былтыр югалган кыз мәетен машина багажнигындагы чемодан эчендә тапканнар
23 яшьлек кызны егете эзәрлекли, акчасын урлый, үтерү белән яный.
Бер ел элек Мәскәүдә 23 яшьлек манкенщица Грета Ведлер югала. Быел 12 мартта аның мәетен Липецк шәһәрендәге шәхси йорт гаражында машина багажнигында табалар. Кызның мәете чемодан эчендә була. Бу турыда башкала буенча Тикшерү идарәсенә сылтама белән «Вести» каналы хәбәр итте.
23 яшьлек Гретаны соңгы тапкыр 2021 елның 24 февралендә күрәләр. Гретаның танышлары сүзләренчә, аны элеккеге егете эзәрлекли, ул егеттән качу өчен фатирыннан күченеп китә. Егет Гретаның 150 мең сум акчасын да урлаган, соңгы вакытта кызга үтерү белән янаган. Шуңа күрә Грета Мәскәүнең төньягындагы кунакханәгә күченгән, аннары элемтәгә чыкмый башлаган.
Кызны былтыр мартта эзли башлаганнар, ләкин таба алмаганнар. Быел 12 мартта хокук саклаучылар Липецк шәһәрендәге бер шәхси йортка килә. Гаражны тикшергәндә, машина багажнигында чемодан табыла, аның эчендә Грета мәете була.
Җинаятьтә шикләнеп Гретаның элеккеге сөйгән егетен тоткарлыйлар, хәзер аның белән тикшерүчеләр эшли.
Грета Ведлерның үлгән вакыты тәгаен генә билгеле түгел, ул башта тоткынлыкта булуы ихтимал, диелә хәбәрдә.