Бурятия башкаласы Улан-Удэ шәһәренең тирә-ягын янгыннар камап алган. Көчле җил утны коточкыч тизлектә тарата. Бу хакта «База» Телеграм-каналы яза.
Бурятиядә 100 гектардан артык мәйданда урманнар, шулай ук корыган үләннәр яна. Ураган җиле аркасында янгын башкалага ук килеп җиткән, һәм шәһәр читендәге корылмаларга да ут капкан.
Җирле халык утның торак йортларның да камап алганын сөйли. Әмма шәһәр хакимиятләре, торак булмаган корылмалар яна, дип ышандыра, тик утның торакларга күчү куркынычы бар.
Улан-Удэның үзендә янгынның 5 чыганагы теркәлгән. Барыннан да бигрәк Бурвод микрорайоны зыян күргән.
Хакимият кешеләрне эвакуацияләү турында хәбәр итте. Хәл ураган җиле аркасында да катлаулана, көчле җил утны тиз тарата.
Соңрак билгеле булганча, Бурятиядә 20 торак йортка һәм хуҗалык корылмасына ут капкан. Гадәттән тыш хәлләр министрлыгы коткару чараларын арттыра.
Шулай ук оператив хезмәтләр, янгын мәйданы 10 мең квадрат метрга кадәр арткан, дип хәбәр итте.