Булат Җиһаншин: "Күпме яшь, талантлы композиторлар, аранжировщиклар, диджейлар, җырчылар бар - ләкин алар күләгәдә кала"
Татар эстрадасы җырчысы Булат Җиһаншин татар эстрадасына үзгәрешләр кертү һәм туган телне саклау мәсьәләләренә карата үз фикерен Инстаграм аккаунтындагы битендә язган.
"Яшьләр ныграк туган телебезгә тартылсын өчен күбрәк заманча музыка өстендә эшлим. Әйе, күнеккән эстрада юнәлешен дә онытмыйм. Ләкин, телебезнең киләчәген кайгыртсак - заманчалыкка тартылырга кирәк. Президентыбыз Рөстәм Миңнеханов бер өч ел элек: "Эстрадабыз аяныч хәлдә", - диде, һәм үзгәртергә тәкъдим итте.
Кайберләре бик дөрес аңлап бетермәде, минемчә. Әйе, яңа проектлар ачылды, бу бик шәп, "jazz" стиле дә бик кирәк мәдәниятебезгә (һәм бик яратам моны), ләкин заманча, яшьләрне җәлеп иткән, "Dance" стилендәге проектларны финанслау юк. Күпме яшь, талантлы композиторлар, аранжировщиклар, djлар, җырчылар бар - ләкин алар ничектер күләгәдә калалар.
Ә алар беренчелектә булырга тиеш, чөнки бар дөнья заманчага күчеп бетте дисәң дә була. Мәдәнияттәге түрәләр ишетсен иде моны... Ә әлегә без эшлибез, иҗат итәбез", - дип язган Булат Җиһаншин.