Булат Бәйрәмов туйда бүләк җыярга өйрәтә - видео
Булат Мәскәү туе мисалында бүләк җыю йоласын күрсәтә. Кияү белән кәләш зал уртасында басып тора. Кунаклар берәмләп кәләш янына киләләр. Алар киленнән "Альяпкычыңны кем бәйләде", дип сорыйлар. Кыз "Әнием" дип җавап бирә.
Кунакларның барысы да диярлек шушы сорауны бирәләр икән. Кыз аларның барысына да мөлаем гына җавап кайтара. Шуннан соң алъяпкыч кесәсенә конвертлар салып китәләр.
Булат Бәйрәмов Мәскәүдә узган туйдан видеоны инстаграмдагы битенә урнаштырды.
"Түбән Новгород өлкәсе татарларның бик матур традицияләре бар: туй мәҗлесе ахырында кияүнең әнисе киленгә матур фартук бәйли. Шул вакыт кунакларның берсе: "Кем бәйләде фартугыңны?" - дип сорый. Кәләш: "Әнием!" дип җавап кайтара. Һәм барлык кунаклар диярлек кәләш янына килеп шул сорауны кабатлый, ә кәләш елмаеп, мөлаем тавышы белән: "Әнием" дип җавап кайтара. Кунаклар исә җавапны ишетеп фартук кесәсенә "күчтәнәчләр" салалар. Бездә, Татарстанда бу традиция бармы ул? (махсус "фартук" дип яздым, нижгарларча)", дип язып калдырган Булат Бәйрәмов видео янына.
Инстачыларның күбесе мондый йоланы белмәвен әйтә. "Арчада Латыйповлар алып барган никахта беренче тапкыр күрдек", - дип язган бер инстачы.