Булат Бәйрәмов хатынына утта янмый, суда батмый торган «Мерседес» алган - видео
Булат Бәйрәмов белән Ләйсән Гыймаева «Фуфунья»ның чираттагы маҗараларын тәкъдим итте.
Булат белән Ләйсән урам буйлап бара. «Хатын, сиңа бүләккә машина алдым әле мин», — ди ире. «Нәрсә уңаеннан?» - дип кызыксына хатын. «Сине ярату уңаеннан», — ди Булат.
Хатын исә моны күптән төштә күргән икән инде. Видеода «Мерседес» машинасы, Ләйсәннең шул машинага утыруы күренә, хыялы сурәтләнә.
Шуннан соң Булат Ләйсәнне арбалы УАЗ машинасы янына алып килә. Ләйсән УАЗ билгесен күреп шакката. «Кайда соң „Мерседес“ билгесе?» — ди. Булат исә мондый билгенең текәрәк булуына ышандыра, эчкә кереп утырып карарга куша.
Ләйсән машина эченә кереп, саклык мендәрләрен дә сорап маташа. «Хәзер мин сиңа сигез мендәр алып чыгам», — ди ире.
«Менә сиңа утта янмый, суда батмый торган «Мерседес», — ди.
Ләйсән исә: «Төшемдә „Мерседес“ күргән идем», — дип тарткалашмакчы була.
«Мин дә төшемдә Анджелина Джолины күрдем», — ди аңа ире.