Булат Бәйрәмов белән Ләйсән Гыймаева сайлау темасына кызыклы видео төшергән
Инстачылар Булат Бәйрәмовны сайлаган.
Булат Бәйрәмов белән Ләйсән Гыймаева төшергән видеоларның соңгылары сайлаулар темасына багышланган иде. Ләйсән ирен президент итеп күрергә тели, президент хатыны буласы килә, тик Булатның гына җаваплы эшкә алынасы килми.
Инстачылар иҗади гаиләнең видеоларын шулкадәр яратып караганнар, хәтта чынлап торып бюллетеньда Булат Бәйрәмовның исемен эзләгәннәр. Хәтта берсе президентлыкка кандидатлар исемлегенә Булат Бәйрәмов дип өстәгән дә, аны сайлап тамга куйган һәм фотога төшереп артистка юллаган. «Ләйсән Гыймаева бик каты әзерләде бит, тырышлыгы әрәм булмасын», — дип тә язган инстачы.
Булатның күңеле булган инде, үз аккаунтына фотоны куеп, «Гөлназ, рәхмәт», — дип тә язган.
Башка сайлаучылар да: «Кандидатлар исемлегендә сезнең исемегез юк иде, кәеф төшеп кайтты», «Исемлектә сез булмагач, бармыйбыз да», — дип язганнар уены-чынын бергә.
«Булатның исемен өстәп, сайлап кайтыйк», «Бу — шәп идея», — дип күтәреп алучыларны: «Максатчан рәвештә бюллетень бозган өчен баштан сыйпамыйлар», — дип кисәткән бер журналист.