Бүген, 30 июньдә, «Черек күл» паркында яңа төр җырлы кичә – «Хорлы караоке» узачак. Кичәнең махсус кунагы – Татарстанның халык артисты Миләүшә Тәминдарова җитәкчелегендәге Татарстан Республикасы Дәүләт камера хоры. Бу хакта Казан мэриясе матбугат хезмәте хәбәр итә.
Бүгенге кичтә хор саф һавада халык тарафыннан яратып җырлана торган җырларны башкарачак. Һәр тамашачы зур шәһәр хорының бер өлеше була алсын өчен җырларның сүзләре экранда күрсәтелеп барачак.
Чара «Татарстанда җәй» проекты кысаларында уздырыла.
Җыр сәнгатен сөючеләрне паркның амфитеатрында көтәләр.
«Хорлы караоке» 20:00 сәгатьтә башлана.