Башкортстанның Салават шәһәрендә яшәүче 36 яшьлек ир-ат бергә яши торган 39 яшьлек хатынны вәхшиләрчә үтергән. Бу турыда «Башинформ» Тикшерү комитетына сылтама белән хәбәр итте.
26 апрель төнендә хатын-кызның ачыргаланып кычкырганын күршеләрнең күбесе ишеткәндер. Кемдер полиция дә чакырган, ләкин инде соң булган. Ир хатынын урамда кыйный башлый, аннары фатирда кыйнап үтерә.
Полиция хезмәткәрләре фатирга керер өчен коткаручылар чакыра, ишекне ватып ачкач, фатирда коточкыч хәл күрәләр. Ир хатынының мәете белән кочаклашып ята.
Тикшерү версиясе буенча, ир-ат бергә яши торган хатыны белән талаша. Аннары хатынның муеныннан тотып кыса. Шулай итеп, ул хатынның бугазын сындыра. Хатынның мәетен иртәнге якта фатирда табалар. Алар ир белән шушы фатирда яшәгән.
Ир-ат моңа кадәр дә административ һәм җинаять җаваплылыгына тартылган, яшәү урынында тискәре яктан сыйфатлана, табиб-наркологта хисапта тора. Аны сак астына алганнар. Тикшерү бара, диелә хәбәрдә.