Буа районында ир-ат исерек килеш әти-әнисен кыйнаган
Әлеге факт буенча җинаять эше кузгату мәсьәләсе хәл ителә.
31 гыйнварда Буа районының Әнәле авылында яшәүче 29 яшьлек ир-ат үз әти-әнисе белән бергәләп спиртлы эчемлекләр кулланган. Күпмедер вакыттан соң, исерек туганнар арасында бәхәс килеп чыккан. Бу хакта Татарстан буенча Эчке эшләр министрлыгы матбугат үзәге хәбәренә сылтама белән «Татар-Информ» язды.
Бәхәс кызып киткәннән соң, сәрхүш ир-ат әтисен һәм әнисен кыйный башлый. Каты кыйналу аркасында 51 яшьлек ир һәм 49 яшьлек хатын төрле дәрәҗәдәге тән җәрәхәтләре алган. Соңрак алар икесе дә үзәк район хастаханәсенә озатылган.
Хәзерге вакытта әлеге факт буенча җинаять эше кузгату мәсьәләсе хәл ителә.