«Бу җыр елның хиты булачак»: Илсөя Бәдретдинова кем белән дуэт җырлаган?
Яңа дуэтны Илсөя Бәдретдинованың тамашачысы җылы кабул иткән.

Илсөя Бәдрединова үзенең төркемендәге музыкант Илнур Колахмәтов белән дуэт җырлаган. Әлегә серле җырны бер мәҗлестә генә башкарсалар, бик тиздән җырның яздырылган варианты музыкаль мәйданнарда урын алачак. Бу хакта Илсөя Бәдретдинова инстаграмда үзе хәбәр итә.
«Арала бу газаптан» җырын күпләрегез кабул итте. Үзебезгә бик-бик ошады», — дигән җырчы.
Илсөянең тамашачысы, чыннан да, җырны бик җылы кабул иткән. Алар әлеге дуэтның каз тәннәре чыгаруы турында яза. «Искиткеч образлар, искиткеч җыр. Ә ничек итеп башкарасыз, ничек итеп тәкъдим итәсез сез аны», «Һичшиксез, бу елның хиты», — дигәннәр.
Икенчеләре Илнурның искитмәле тавышына сокланган. «Бу дуэтны жырламаган булса, белмәс идек талантын. Бигрәк бар яктан килгән малай бу. Курайда да бик матур уйный, гармунда да», «Их, бу егетең әз генә өлкәнрәк түгел! Нинди матур пар булыр идегез. Бигрәк сөйкемле бу бала», — дигәннәр.
«Чын дөресен әйткәндә, бу җырның элек булганын Илсөя Бәдретдинова җырлагач кына белдем. Ике вариантын да чагыштырдым, сезнеке күбрәк ошады», — дип тә язганнар.