«Бу акчалар – әнинеке»: Ростройнадзор бүлеге башлыгын ришвәт өчен хөкем итәләр

Гаепләнүчеләр эскәмиясендә – Татарстанның Төньяк-көнбатыш территориаль органы Дәүләт төзелешен күзәтү бүлегенең элеккеге башлыгы Илнур Сәмигуллин. Аңа ришвәт алуда гаепләү белдерелә. Өстәвенә, ул ришвәтне төзелеш материаллары һәм торак сатып алуга ташламалар белән дә алган, дип яза «Республика Татарстан» газетасы хәбәрчесе Исаева Лика.

Сәмигуллин үз гаебен танымый, әмма башта, теләмәсә дә, барысын да сөйли. Ә шаһитлар сөйли башлагач кына, үз-үзенә каршы шаһитлык бирмәү хокукын искә төшерә, Конституциянең 51нче маддәсеннән файдаланачагын белдерә һәм дәшми кала. Шуңа күрә хәзер аның җинаять эше шаһитлар һәм дәлилләр нигезендә төзелгән.

«Дуслык өчен 500 мең сораган»

Татарстан Дәүләт төзелеш күзәтчелеге инспекциясенең Капиталь төзелеш объектларын төзү һәм реконструкцияләүне күзәтү буенча Төньяк-көнбатыш территориаль органы җитәкчесе итеп Сәмигуллин 2010 елның 1 гыйнварыннан билгеләнде. Аның карамагында республиканың 10 районыннан дәүләт инспекторлары була: Балык Бистәсе, Лаеш, Питрәч, Биектау, Теләче, Саба, Балтач, Кукмара, Арча һәм Әтнә.

Аның элеккеге хезмәттәшләренең күбесе, бу районнарда төзүче компанияләргә, проблемалардан качар өчен, төзелеш инспекциясе начальнигы белән «дуслашырга» кирәклеген ишеткәннәрен сөйләде. Оешма җитәкчеләренең берсе бу имеш-мимешне сорау алу вакытында раслады.

Сәмигуллин үзенең дуслыгы бәясен 500 мең сум дип бәяли. Саннарны кәгазьгә яза һәм сумманы төзүчеләргә күрсәтә торган була. Шаһит бу акчаны түләгәнме, юкмы – билгесез, әмма, аның фирмасы каршылыксыз рәвештә йортлар төзегәненә карап, «дуслык» уңышлы булган, дияргә була.

«Дуслык» хисабына Сәмигуллин 2018 елда үзенә коттедж төзи башлый. Төзелеш оешмасы «бушлай» йорт һәм гаражга нигез сала, брусчатка сала. Төзелеш материаллары да төзүчеләр хисабына сатып алына. Бу ришвәтнең гомуми суммасы 382,2 мең сумнан ким булмаган, бу – зур күләмдә. Сүз уңаеннан, әлеге оешманың директорларын хөкем итмәячәкләр. Ул үзенең гаебен таный һәм үз теләге белән тикшерүгә ярдәм итте.

Шул ук 2018 елда төзелеш инспекторлары Питрәч районы Куюки бистәсендә йортлар төзегәндә хокук бозуларны ачыклаган. Оешма җитәкчесенә 200 мең сум административ штраф яный, һәм ул Сәмигуллин белән шәхсән «килешү» төзергә карар итә. Бу юлы бүлек начальнигына Лаештагы шәхси участогын төзекләндерү кирәк була. «Килешү» участокка керү капкаларын сатып алу һәм урнаштыру, участокта су төшерү системасын төзү белән мөмкин булды. Моның өчен тимер-бетон лотоклар сатып алынды, кертелде һәм урнаштырылды. Ришвәтнең гомуми суммасы 163 мең сумнан ким булмаган – кабат зур күләмдә.

Бәхетсез фатир

2021 елда Сәмигуллин Лаеш районының Усады авылында «Счастливый» микрорайонында 16 катлы йорт төзегәндә кечкенә хокук бозуларга күз йома. Аңа бу йортта 2 бүлмәле фатирга ташлама бирәләр. Документлар буенча бу фатирны аның әнисе сатып алган.

Сәмигуллинның үзендә Лаешта йорт, Казанда фатир һәм машина урыны бар. Болар аңа әтисе үлгәннән соң калган. Әнисе өчен 58,17 квадрат метрлы фатирны ул 16нчы катта карап куйган. Төзүче компания җитәкчелеге ташлама ясый, һәм территориаль Росстройнадзор җитәкчесенең әнисе бик отышлы бәядән – бары 2,5 млн сумга гына фатир сатып ала. Базар бәясеннән күпкә түбәнрәк. Идел һәм Казанга панорама күренеше булган 2 бүлмәле фатирның чын бәясе 5 млн сумга якын булыр иде. Монда да – «бик күп күләмдә» ришвәт. Фатир сатып алынган булса да, милек хокукы теркәлмәгән.

«Барысы да – әнинеке!»

Сәмигуллин йортында тентү вакытында 4,8 млн сумга якын һәм 1140 АКШ доллары табыла. Кайдан? Сәмигуллин оперативникларга «бу акчалар әнинеке» дип аңлата. 270 мең сумны алар хатыны белән үзләре җыйган. Ә калганы – әнисенеке. Ул, имеш, җыйган акчаларын аларга калдырган. Акча онкология белән интегүче апасын дәваларга кирәк. 10 районның элеккеге баш төзелеш инспекторы сүзләренчә, долларларны аңа туган көненә бүләк иткәннәр.

Шаһитлык бирүдән баш тарткан Сәмигуллин судны Казандагы СИЗО-2дә көтә.