«Бу — куркыныч билге». Башкортстанда авылларга килүче бүреләрдән зарланалар - видео
Көндез юлдан чаптырып йөрүче бүреләрне шаһитлар төшереп алган.
Башкортстанның Ишембай районында бүреләр авылларга якын килә башлаган. Биредә яшәүчеләр ерткычлардан курка, дип «Башкортстан» телеканалы хәбәр итә.
Бер ир-ат юл буенда ике бүрене видеога төшергән.
«Ишембай районында яшәүчеләр чаң суга. Бүреләр торган саен ешрак күренә. Авыл халкы трассадан йөгереп бара торган бүреләрне видеога төшергән. Ерткычлар сигнал тавышыннан да курыкмый. Бу — куркыныч билге, ди авыл халкы. Мәләвез һәм Бөрйән районнарында да шул ук хәл», диелә бу хәбәрдә.
Видеода көндез юлдан чабып бара торган бүреләр сурәтләнгән.
Соңгы тапкыр бүрене Макаров авылы янында видеога төшергәннәр. Район халкы көн саен диярлек ерткычлар очрата икән.
Әлеге видеода урамда эңгер-меңгер чак сурәтләнгән, юлдан тагын бүре чабып бара.