«Бу эш тә сезгә килешеп тора»: Гөлнара Тимерҗанова сыер савучы булып эшкә урнашкан
Татарстанның атказанган артисты Гөлнара Тимерҗанова карантин вакытында фермага сыер савучы булып урнашуы турында Инстаграмдагы сәхифәсендә хәбәр итте.
«Ачтан үлеп булмый, иптәшләр, сөт, ипи, майдан аерылмыйк. Менә шушындый матур сыерлар янына Гөлнара Тимерҗанова нәрсә эшләргә килгән икән дисәгез, мин монда эшкә урнашып йөрим. Йөрим генә түгел, унбиш көн сыер савам, Аллага шөкер! Концертларыбызны туктаттылар. Лаеш районындагы фермага сыер савучы булып урнаштым, Сания апаны лаеклы ялга җибәрдек.
Аллага шөкер, эшкә алдылар. Җәй көне дә артистлар килсеннәр, эшкә алабыз, диделәр.
Сыерлар күп сөт бирә. Моңарчы ун-унбиш литр бирсә, бүген егерме бишкә күтәрдек, чөнки җырлый-җырлый савабыз. Кесәдә акча, сәламәтлегебез булса, кешегә нәрсә кирәк инде? Татар хатын-кызы кайда да эшен таба», — дип сөйли видеода Гөлнара Тимерҗанова.
«Килешеп тора бу эш тә сезгә, исән-сау гына эшләгез. Сыер дип, үгез саумагыз ялгыш, күп сөйләшеп», «Савып күрсәтергә иде аны, болай басып сөйләп торып була инде ул», «Фирдүсне көтү көтәргә чакыр, бер акырып җибәрсәме карлыккан тавышы белән...» — дип яза халык.