БТР куып алып китеп танылган Фәнис Хөсәеновның истәлегенә мәктәптә парта куелган
«Башинформ» хәбәр итүенчә, Башкортстанның Тәтешле районында хәрби операциядә һәлак булган Фәнис Хөсәеновның исемен мәңгеләштергәннәр. Ул укыган Яңа Кайпан (Новокайпаново) авылы мәктәбендә Фәнис Хөсәенов истәлегенә парта урнаштырылган.
Мәктәпне тәмамлагач, Фәнис Хөәсенов Булкайпан авылында колледжда укыган. Анда да истәлек тактасы урнаштырылды, дип сөйләгән авыл башлыгы Фәнүр Шәйхисламов.
«Ул безне яшь килеш ташлап китте, чын ирләрчә, сугышта, Ватанны саклап китте. Югалту ачысы белән бергә аның өчен горурлык хисләре кичерәбез!» – дигән ул.
Фәнис Хөсәенов «Барс-17» батальонында хезмәт итә. 2022 елның сентябрендә ул БТР куып алып кайта. Бу вакыйгадан соң ул ялга кайта, җирле телевидениедә шул хакта репортажлар була. Фәнис Хөсәенов кабат хәрби операциягә киткәч, гыйнвар башында һәлак була, 17 гыйнварда аны җирләделәр.
