«Бруталь егет» сүзе яхшы мәгънәдә әйтеләме?

«Бруталь ир-ат», «бруталь егет» дигән сүзтезмәне, гадәттә, матур киенгән, гәүдәсе нык һәм көчле булган, төз ир-атларга карата әйтәләр. Бу сүз кино-фильмнарда да кулланыла. Көндәлек тормышта да чибәр ир-атларга карата «бруталь» дип әйтүне еш ишетергә мөмкин.

Тик, сүзлекләргә карасаң, «бруталь» сүзенең тискәре мәгънәдә кулланылырга тиешлеге ачыклана.

«Бруталь» — тупас, кырыс, көчле, кырынмаган һәм башка шундыйрак мәгънәгә ия. Бу сүзнең синонимнары рәхимсез, каты күңелле. Антонимнары исә — «ягымлы», «йомшак» сүзләре.

«Брутальный» итальянчада «brutto» — «начар» дигән сүзгә охшаш. Итальянчага ул латин теленнән кергән дип фаразлана. Латинча «тупас» дигәнне аңлата. Француз телендә «brutal» сүзе «хайвани», «кырыс» дигәнне аңлата.

Шулай итеп, «бруталь» — гади, тупас, көчле, ышанычлы, гадәти булмаган, кайвакыт хәтта шапшак дигән мәгънәгә тоташа.

Яраткан егетегез, ирегезгә карата «бруталь» ир-ат дип әйтер алдыннан, шул хакта уйлап алсагыз хәерле булыр. Мәгънәсе тискәре булган сүз әйтеп, үпкәләтүегез ихтимал.