Британиядә коронавирусның лабораториядә ясалган вирус булуын белдерделәр

Британия профессоры Ангус Далглиш һәм Норвег вирусологы Биргер Соренсен коронавирус кеше тарафыннан махсус ясалган дип белдерде. Бу хакта Daily Mail га сылтама белән РИА Новости яза.

Белгечләр фикеренчә, Кытай галимнәре SARS-CoV-2 вирусын Ухань лабораториясендә ясаган. Аннары алар «эз югалтырга», вирусның табигый мутация нәтиҗәсендә барлыкка килгән икәнлеге күренсен өчен тырышкан.

Далглиш һәм Соренсен Уханьда 2002-2009 еллар арасында үткәрелгән тәҗрибәләрне тикшергән һәм Кытай галимнәре, Америка галимнәре белән бергәлектә вирусны ясаган дигән нәтиҗәгә килгән.

Белгечләр фикеренчә, вирусны мөмкин кадәр йогышлырак итәргә тырышканнар. Кытайлар ярканатлардагы вирусны алып аңа «энә» «кадаган». Шушы энәдә 4 аминокислота рәте табылган, бу исә вирусның табигый булмавын күрсәтә ди Далглиш һәм Соренсен. Барлык аминокислоталар да «уңай» — ул кешенең «тискәре» күзәнәкләренә магнит кебек ябыша. «Уңай» аминокислоталар, магнит полюслары кебек, бер-берсеннән этелә, шуңа күрә табигатьтә өч «уңай» аминокислоталы рәт тә сирәк очрый. Ә дүрт «уңай» аминокислоталы рәт — мөмкин түгел диярлек күренеш», — дигән Биргер Соренсен.

АКШ та коронавирусның очраклы килеп чыгуына шик белдерә. Бөтендөнья сәламәтлек саклау оешмасы күптән түгел үз докладында коронавирусның Ухань лабораториясендә ясалып таралуын мөмкин түгел хәл дип атаган иде. Оешма галимнәре аны ярканаттан башка берәр җан иясенә, аннары кешегә күчкән дип белдерде. АКШ һәм тагын 13 ил бу нәтиҗәләр белән килешмәвен әйтте, вирусның килеп чыгышын җентекләп өйрәнүне таләп итте. Кытай исә АКШның бу гаепләвен кире кага, аны «сәяси уен» дип белдерә.