Приморье өлкәсенең Хрустальный авылында 2 апрельдә югалган 5 яшьлек баланы тапканнар. Аны Тикшерү комитеты хезмәткәрләре, коткаручылар, хокук саклаучылар, авыл халкы, волонтерлар эзләгән. Бу турыда Россия Тикшерү комитетының Приморье крае буенча Тикшерү идарәсенең матбугат хезмәте хәбәр итте.
Малайны этләр белән кинологлар да эзли. Эзләү төн буе дәвам итә. Сабыйны икенче көнне урманда табалар. Ул җирдә ята, янында эте була.
«Эт баланың гомерен саклап калган, урманда берничә сәгать дәвамында малай бик нык туңган. Табиблар аңа өшү диагнозы куйган. Хәзер бала хастаханәдә», – диелә ведомство хәбәрендә.
Тикшерү комитеты балаларны урманнар, сулыклар һәм куркыныч булган башка урыннарда караучысыз калдырмаска чакыра.