Борынын турайту өчен операция ясаткан ир-ат үлгән
Ул наркоздан айныган вакытта бөтен көпшәләрне йолкып аткан.
Мәскәүдәге хастаханәләрнең берсендә яшь ир-ат үлгән. Ул борынына операция ясатырга яткан булган. Бу турыда «Московский комсомолец» сайты хәбәр итте.
38 яшьлек ир-ат борынындагы сөякне турайтырга җыена. Ул табибларга мөрәҗәгать итә. Башта барысы да яхшы бара. Ләкин пациент наркоздан чыкканда дулый башлый. Ул капельницаны тартып ала, сулыш ала торган көпшәне йолкып ташлый. Шуннан соң бу кеше кисәк кенә егыла һәм йөрәге туктап җан бирә.
Табиблар реанимация ясап караса да, ир-атны коткара алмыйлар.
Ир-ат баш миендә кан әйләнеше бозылу сәбәпле үлгән булуы ихтимал. Хәзер тикшерү эшләре бара. Авыру үлемендә табибларның гаебе булу-булмавы ачыклана, диелә хәбәрдә.
