Алып баручы, журналист, җырчы Зөлфәт Зиннуров, үз тәҗрибәсеннән чыгып, файдалы да, гади дә киңәш белән уртаклашкан. Мунча кергәндә сарымсак төнәтмәсен мичкә сибәргә кушкан ул.
«Сарымсак төнәтмәсен мичкә сибеп, мунча кердек. Алты-җиде тырнак сарымсакны дүрткә бүләсең дә, кайнаган су салып, каплап, унбиш минут төнәтәсең. Файдасын бик нык күрәм: борыннарны чистарта, ютәлне бетерә, сулыш юлларын ача. Авырмыйк!» – дип язган Зөлфәт ике кызы белән мунчадан соң төшкән фотосурәте астына.
Шоуменның виртуаль дуслары: «Сарымсак исе мунчадан озак бетмидер ул», «Хәзерге заманда сарымсак исенең бетмәве хәерлерәктер дә әле. Адым саен авыру, вирус», «Шифасы тисен», «Зөлфәт, энем, чын тормышчан әти булып, ике кызыңны тәрбиялисең. Сокланам сезгә», – ише комментарийлар калдырганнар.
Фото Зөлфәт Зиннуровның социаль челтәрдәге шәхси аккаунтыннан