«Бомба, диләр»: Данир Сабировның Бөгелмәдәге концерты алдыннан көтелмәгән хәл булган

Данир Сабировның бүген Бөгелмәдә буласы концерты алдыннан күңелсез хәл килеп чыккан.

«Бөгелмәдә без бүген. Концерт булырга тиеш иде, әмма, мәдәният йортында – бомба, диләр», – дип яза ул. Мәдәният йортына кинологлар килгән. Концертка дип килгән халык та мәдәният йорты янына җыелган.

Халык та, җырчы үзе дә төшенкелеккә бирелмәгән. Тамашачы урамда ук җырлап тора. «Менә шунда гына булсын концерт», – дип елмаялар, артист белән фотога төшәләр. «Рәтләнер инде. Минем белән мондый хәл булганы бар», – ди артист.

Бинаны тикшергәннән соң, халыкка «керегез» диләр. «Менә бит, Аллаһка шөкер», – ди җырчы. Концерт булгандыр, дип ышанасы килә.