Bloomberg агентлыгы ялгышлык белән Россия Украинага бәреп керде дигән хәбәр чыгарган
Агентлыкта моны ялгышлык дип атаганнар.
АКШта теркәлгән Bloomberg агентлыгы Россия Украинага бәреп керде дигән яңалык чыгарган. Бу безнең вакыт белән төн уртасы, агентлыкта 16:00 сәгать булган. Яңалык ярты сәгать кенә эленеп тора, аны алып аталар, хата икәнлеген әйтәләр, гаеплеләр ачыкланачагын белдерәләр.
Редакциядә бу яңалыкның ни сәбәпле куелганын да аңлатканнар. Агентлыкта мөмкин булган сценарийлар алдан ук язылып куела, дип аңлатканнар. Агентлык күптән инде Россия белән Украина арасында сугыш булачак дип фаразлый, менә инде "башлап та куйганнар". Журналистлар бик нык үкенә, дигәннәр агентлыкта.
Шушыңа охшаш хәл Үзбәкстан президенты Ислам Кәримов белән бәйле рәвештә булган иде. Ислам Кәримов вафат икән дигән имеш-мимеш таралгач, "Интерфакс" "Ислам Кәримов вафат" дигән мәкалә әзерләгән. Ялгышлык белән ул мәкаләне кемдер чыгарган. Интерфакс ул инцидент өчен гафу үтенгән иде.
