Авыл контентын күрсәтеп популярлык казанган блогер Василий Иванов, уң кулының сеңерләре өзелеп, хастаханәгә эләккән.
«Казанда хастаханәдә әле, дуслар. Кичә операция булды, әйбәт, дип әйттеләр. Сеңерләрне тегеп куйдылар. Менә хәзер шушы фиксатор белән 1 ай йөрисе. Баян шикелле бер нәрсә. Монысы – Саба районыннан бер абый, ул да минем кебек «баян» күтәргән», – дип, палатада үзе белән бергә ятучы иптәшләрен дә күрсәтеп алган ул.
«Эшне сул кул белән эшләргә маташам. Кырынганда да киселдем, сул кул белән юньләп эшләп булмый шул. Күз тиядер сиңа, диләр. Алай күз тиярлек җирем дә юк инде», – дип аптыраган Василий.
«Эчләрең янып ятадыр, самый эш вакытында. Исән-сау терелеп кайт», «Ашыкма, Василий, дәваланып бет, эш качмый ул», «Терел, брат», – дип комментарийлар юллый аңа виртуаль дуслары. «Баяныңны кыстырып, гастрольгә инде сиңа, Василий», – дип шаяртучылары да бар.