Блогер, заказга шигырьләр язучы Рамилә Антонованың ире Вильданны мобилизацияләгәннәр. Рамилә сәхифәсенә әтисенең кечкенә сабыйлары белән саубуллашкан видеосын куйган…
«Безнең «әтисе кызы» һәм «әтисе улы» бар. Алар синең белән горурланалар. Аллаһы теләсә, син Инзилә белән аның туенда «медляк» биегәндә, бүгенге сынауларны елмаю аша искә төшерербез.
Әлеге сынаулар безгә юкка гына бирелмәгән. Булганның кадерен белергә өйрәнү, бер-беребезгә карата хисләрне ныгыту һәм безне көчлерәк итү өчен бирелгән алар безгә. Алар янында башка авырлыклар уен булып кына тоелачак», – дип яза Рамилә.
Блогер хис-кичерешләрен шигырь юлларына да салган.
«Мин бит көчле! Ничек инде шулай?
Бернәрсә дә эшли алмыйммени?
Ышанганда, талпынганда йөрәк,
Күңел һаман моңсу көйләр көйли.
Мин бит көчле, мин бит көчле, көчле, диеп
Ышандырган булам үземне.
Көчле булгач ник берни үзгәрми?
Һаман яшьләр били күземне?
Үз-үземне алдаламыйм бүтән…
Көчсез чакларым да була икән…»