Блогер Рәзил Борчак көмәнле хатынның көйсезлеге турында видео төшергән
Видеода көмәнле хатыны катнаша.
Блогер Рәзил Борчак көмәнле хатыны белән кызыклы видео төшереп өлгергән, хәзер инде аларның кызлары бар.
Видеода күренгәнчә хатыны корсагын киереп йөри, ул арада шактый зур мәче дә килеп чыга.
«Синең коллегаң йөри», — ди ире хатынына.
«Әтиләре төрледер дип өметләнәм», — дип җавап бирә хатыны.
Көмәнле хатын акбур кимерергә теләвен әйтә, аннары бензин, утын, хәтта тере тавыкны да иснәп карый. Ул машинага утырса да, диванга утырса да авырдан тора. Әле эссе дип тәрәзә ачарга куша, салкын дип ябуны сорый, аннары аңа кабат эссе.
Бала көтүче ханым кинәт кенә кычкырып җибәреп, өйдәгеләрне куркыта. Алар бала таба башлады дип куркып китә, ә ул бала типкәнгә генә кычкыра икән.
Әле урамда йөрисе килә ди дә, ул арада йоклап та китә.
Кайчандыр көмәнле булган ханымнар да үзләренең сәер теләкләрен искә төшергән: «Мин дә акбур, тозлы пестә (фисташка) белән салкын сөт, редиска белән какы салаты, кыздырылган пилмән, банан белән чипсыны бергә ашадым, кыярны үскән балчыгына манып ашый идем, аның тәмлелеген әйтеп бетереп булмый».
«Бензин, лак, җир, тирес, бәрәңге чиләген, бака иснәдем, баз исен һәм тузан исен ярата идем», — дип тә язучылар бар.
«Өч бала таптым, гадәти тормыш белән яшәдем. „Менә шуны телим һәм нокта“ дигән теләкләрем булмады. Шуңа андый теләкләргә ышанмыйм да», дип язган бер инстачы.