Блогер Искәндәр Гайсин башының чәчсез урыннарына чәч күчереп утырту буенча операция ясаткан.
«26 яшемдә чәчсез йөрергәме? Юк, мин инде болай да берничә ай дәвамында үземне уңайсыз хис иттем. Шуңа да башымның арттагы өлешеннән чәчсез урыннарына чәч күчереп утыртырга булдым. Әллә кайдагы Төркиягә барып йөргәнче, әлеге операцияне Казандагы бик яхшы табибта ясаттым. Чәчләрем бик нык коелды, чөнки әни ягыннан генетикам шундый», – дип язган ул.
Искәндәр әйтүенчә, Казан клиникаларында чәч күчереп утыртуның бәяләре 60 меңнән башлана. «Ничә графт күчерүеңә карап түлисең инде», – дигән ул. Искәндәргә 4600 графт күчергәннәр, 2 айдан тагын бер операция ясалачак.
Искәндәр сәхифәсенә операция алдыннан төшкән фотосын куеп, язылучыларын хафага салган. Текстны укып тормаучылар аны баш миенә операция ясата дип аңлаган.
«Иң мөһиме – матур булып үсеп китсеннәр! «Ашламаларны» вакытында сибеп тор», «Пеләшеңә кагылышлы юморларың бетә икән болай булгач», – дип шаяртучы дуслары да бар.