Биш метрлы крокодил үзен ашатучы хатынны тере килеш йоткан

Индонезия галимәсен тере килеш крокодил йоткан. Лабораториядә ашаткан вакытта, рептилия хатын-кызга һөҗүм иткән. Бу турыда The Daily Mail сайты хәбәр итә.

Фаҗига 11 гыйнвар иртәсендә була. Озынлыгы биш метр чамасы булган крокодил 44 яшьлек Дэйзи Туво исемле хатынны вольерга сөйрәп кертә дип фаразлана. Хатын бассейнга ит ыргыткан вакытта рептилия аны эләктереп ала.

Лаборатория хезмәткәрләре Мэри исемле крокодилның авызында кеше җәсәде күреп ала.

Хакимият органнары фаразынча, крокодил арт аякларына баса һәм 2,5 метр чамасы биеклеккә сикерә. Шуннан соң ул хатын-кыз галимәне койма аша бассейнга сөйрәп алып китә.

Ерткычны балык, тавык һәм башка хайваннарның ите белән тукландырганнар. Ул моңа кадәр бассейндагы башка крокодилларга ташлана торган булган.

13 гыйнварда крокодилны Томохон шәһәренә алып килгәннәр. Биредә аңа төрле тестлар уздырып, галимәне ашаганмы-юкмы икәнен тикшерәләр.

Крокодилның хуҗасы — Япония эшмәкәре. Ул тикшеренү оешмасы ачкан, Туво исемле галимә биредә хезмәт иткән.