Биш бала әтисе булган 45 яшьлек Рамилнең кулын кискәннәр, сөякләре сынып беткән

Биш бала әтисе — 45 яшьлек Рамил Инсафетдинов Нефтеюганск шәһәрендә вахта ысулы белән эшли. Эш вакытында ул сигез метр биеклектән егылып төшә. Рамил һәм аның зур гаиләсе Башкортстанның Бакалы авылында яши. Бу турыда «Башинформ» хәбәр итте.

Алдан социаль челтәрләрдә энергия ресурслары компаниясенә Башкортстаннан вахта ысулы белән барып эшләүче ир-атның имгәнүен хәбәр иттеләр. Ул эретеп ябыштыручы булып эшли. Биеклектә торган килеш ябыштырган вакытта аның янындагы матча-балка ава башлый. Ул ир-атны җиргә егып төшерә һәм өстенә ава. Рамилнең куллары һәм аяклары сынып беткән, ул шок халәтендә була. Тиз арада ашыгыч ярдәм чакыралар. Тик хезмәттәшләре табиблар килгәнне көтеп тормый, ир-атны хезмәт машинасына салып, төзелеш объектыннан Нефтеюганск шәһәренә алып китәләр.

«Алар сәгать ярым чамасы бара, Рамил бик күп кан югалта. Юлда ашыгыч ярдәм машинасы очрый. Бу машина нәкъ менә Рамил янына чакырылган ашыгыч ярдәм була. Тик хезмәт машинасы аның янына туктап тормый, алар китеп бара. Хастаханәгә алып килгәч, Рамилне „юлда таптык, ул сынып беткән иде“ дип әйтәләр. Аннары прокуратура тикшерә торгач кына барысы да ачыклана», — дип язалар социаль челтәрдә. Биредә әлеге гаиләгә матди ярдәм җыю да игълан ителгән.

«Башинформ» агентлыгы хәбәрчесе имгәнгән ир-атның анасы белән элемтәгә чыккан. Бу хатын мәгълүматның дөрес булуын раслаган.

Хәзер Рамил Нефтеюганск шәһәрендә хастаханәдә дәвалана. Рамилне әнисе Гаишә һәм хатыны Алинә тәрбияли. Башта алар Нефтеюганскида Рамил яши торган эш фатирында торып торган, алардан бу фатирдан чыгарга сораганнар. Әлегә Рамилнең әнисе белән хатыны мәрхәмәтле кешеләрдә яшәп тора.

«Хәзер бу эшне махсус комиссия тикшерә. Мин Рамил янында, хатыны да монда. Без Бакалыдан 19 февральдә үк килдек. Без бик тату гаилә. Әби-бабайлар, абый-апалар, балалар — барысы да. Без хәзер Рамилгә бик кирәк. Ул үзе ашый да алмый. Аның аякларында һәм кулларында сөякләре ачык сынган. Баш мие селкенгән, тагын әллә кайсы төшләре имгәнгән. Гангрена башлангач, табиблар аның кулын ампутацияләде. Икенче кулының сөяге дә ачык сынган», — дип сөйли Рамилнең әнисе.

Рамилнең кулын кискәннәр, аягына операция ясаганнар, бот сөякләренә операциягә әзерлиләр. Шулай ук тикшерү эшләре дә бара. Башкортстан буенча Сәламәтлек саклау министрлыгы башлыгы Максим Забелин әлеге вакыйганы үз контроленә алган. Башкортстан табиблары Ханты-Мансийск табиблары белән элемтәгә чыккан. Әлегә Рамилне туган якка алып кайту мөмкин түгел, ул Нефтеюганскида тулы дәвалану курсы уза, аның хәле тотрыклы.

Инсафетдиновлар гаиләсендә 4 тән 14 яшькә кадәрге биш бала бар. Хәзер балаларның дүртесе авылда социаль приютта яши, алар балалар бакчасына һәм мәктәпкә йөри. Сәламәтлеге чикле туган бишенче баланы әбиләре тәрбияли.

Бакалы районы администрациясе юридик һәм матди ярдәм күрсәтә. Район башлыгы бу эшләрне үз контроленә алган, диелә хәбәрдә.