Смоленск өлкәсенең Лебедки авылындагы «Кико» аквапаркында Мәскәү өлкәсеннән килгән 5 яшьлек малай су батутларында сикергәндә батып үлгән. Бу хакта SHOT «Телеграм» каналына сылтама белән Лайф сайты яза.
Бала аквапаркта әтисе һәм игезәк сыңары белән бергә ял иткән. Аквапаркта аларның туганнары да эшләгән була. Өлкәннәр балаларны күз угыннан ычкындыра… Бала батутларда уйный, батут аны аттракционнан читкәрәк атып бәрә. Ул суга егылып төшә һәм бата башлый.
Әтисе һәм коткаручылар аңа ярдәмгә ташлана, ләкин малай суны бик күп йоткан була һәм тончыга. Аны коткарып кала алмаганнар. Хәзер белгечләр бу хәлнең сәбәпләрен ачыклый.
