Биектау районында улы атасының муенын сындырган

20 февральдә Биектау районының Ямаширмә авылында 85 яшьлек бабай мәете табыла. Аны көч кулланып үтерүләре ачыклангач, «Үтерү» маддәсе буенча эш кузгатыла. Бу турыда «Татар-информ» агентлыгы Тикшерү комитетына сылтама белән хәбәр итте.

Җинаятьтә шикләнеп мәрхүмнең 57 яшьлек улын тоткарлыйлар. Тикшерү версиясе буенча, әти кеше улына эчеп йөргән өчен кисәтү ясый. Ир кеше әтисе янына килә һәм картның муенын сындыра. Бабай урында ук үлә.

Фаҗигане бабайның килене — улының хатыны күреп тора, ул шунда ук полициягә хәбәр итә. Шулай итеп җинаятьчене тиз арада тоткарлыйлар.

Ир-ат атасын үтерүдә гаебен танымый, тикшерү эшләре бара, диелә хәбәрдә.