Биатлон буенча дөнья һәм Европа чемпионы, Дөнья Кубогы иясе, Олимпия уеннарында 3 тапкыр бронза медаль иясе, Россиянең халыкара класслы спорт остасы Эдуард Латыйпов икенче тапкыр әти булган. Ул бу хакта үзенең социаль челтәрендә хәбәр иткән. «Хыял командасы», – дип язган спортчы һәм роддомда сабыен кулына тотып төшкән фото керткән.
Фото: © Эдуард Латыйповның социаль челтәре
Танылган биатлончыны Россия биатлончылары союзы да котлаган. «Эдуард Латыйповны һәм аның хатыны Дарьяны икенче балалары туу белән котлыйбыз! Матур гаиләгә сәламәтлек һәм бәхет!» – дип язганнар биатлончылар союзының социаль челтәрендә.
Әти-әни яңа туган сабыйларының кызмы, малаймы икәнен әйтмәгән. Латыйповларның Виктория исемле кызлары бар.
Фото: © Дарья Латыйпованың социаль челтәрдәге аккаунтыннан
- Эдуард Латыйпов – православие динендәге татар егете. Аның әтисе Ратмил Латыйпов – хәрби, әнисе рус милләтеннән. Эдуардның балачагы Самара өлкәсе Камышлы авылында үткән. Шунда ул чаңгы спорты белән кызыксына башлый. «Матч ТВ»га биргән интервьюсында ул татарча белүен дә әйткән иде.