«Безнең заман герое»: Башкортстанда почта ташучы хатын егерме кешене янгыннан коткара
Эльвира Шәяхмәтова пенсия өләшергә дип килгәч, бер фатирда янгын чыгуын күреп ала.
6 гыйнварда Башкортстанның Межгорье шәһәрендә Дудоров урамындагы бер йортта фатирда янгын чыккан. Почта ташучы Эльвира Шәяхмәтова зур фаҗига булдырмас өчен бар көчен куя. Ул тиз арада хәбәр итеп, егермеләп кеше, шул исәптән җиде бала янгыннан котылып кала. Бу турыда «Башинформ» хәбәр итте.
Россия Гадәттән тыш хәлләр министрлыгының Башкортстан буенча Баш идарәсе хәбәр иткәнчә, почта ташучы хатынның гамәлләре кешеләрне коткарып калу өчен бик зур ярдәм иткән.
Янгын чыккан көнне Эльвира Шәяхмәтова пенсия өләшеп йөри. Ул беренче подъездга керә һәм ялкын чагылышын күреп ала. Икенче каттагы фатир тәрәзәсеннән куе төтен чыга, кешеләр кычкырышкан тавыш ишетелә.
Йорт агач такталардан төзелгән булуын һәм ялкын бик тиз таралу мөмкинлеген исәпкә алып, Эльвира эшне тиз тота. Шаһитлар янгын сүндерүчеләрне чакырган арада, почта ташучы хатын фатирларга шакып йөри, кешеләрне урамга чыгарырга ярдәм итә. Икенче подъездда җитди авыру пенсионер хатын яшәвен белгән Эльвира тиз генә аңа да шалтырата, өйдән чыгарга кирәк булуын әйтә.
«Эльвира өйдәге барлык кешеләргә хәбәр итә, шаһитлар белән бергәләп йорттагы электр челтәрен сүндерә. Аннары үзе йөри алмый торган пенсионер хатынга фатирдан чыгарга ярдәм итә. Эльвира Ишмөхәммәт кызына зур рәхмәт белдерәбез», — дип хәбәр итте Россия Гадәттән тыш хәлләр министрлыгының Башкортстан буенча Баш идарәсенең матбугат хезмәте.
Башкортстан Башлыгы Радий Хәбиров Эльвира Шәяхмәтованы бүләкләргә йөкләмә бирде.
«Эльвира Шәяхмәтова — безнең заман герое. Ул егерме кеше, шул исәптән җиде бала гомерен саклап кала. Зур фаҗига булдырмый. Мин Эльвира Шәяхмәтованы дәүләт бүләгенә тәкъдим итәргә йөкләмә бирдем. Бүләк тапшырганда без очрашып, мин аңа үзем рәхмәт әйтеп, кулын кысачакмын. Үзегезне саклагыз», — ди язган Радий Хәбиров социаль челтәрләрдә.