Айдар Галимов «Адашканнар» җырын тәкъдим итте. «Уйлап карасаң, әлеге заманда без барыбыз да – берникадәр дәрәҗәдә адашканнар. Акны – карадан, турыны – кыектан, дөреслекне ялганнан аеру бер дә җиңел түгел бүгенге көндә. Ә киләчәккә ниндидер зур өметләр, планнар кора алмавыбыз, бәлки, иң катлаулысыдыр.
Ә шулай да ышаныч яшәтә кешене. Томаннар таралып, болытлар ачылып, зәңгәр күктә кояш чыгып, бер яктырыр әле бу дөньялар. Төшенкелеккә бирелмичә, курыкмыйча, ышанычлы адымнар белән алга атлыйк. Бер-беребезгә терәк, киңәшче һәм юл күрсәтүче булыйк», – дип язган җырчы социаль челтәрдәге сәхифәсенә.
«Яңа җырыбызны бергәләшеп тыңлагыз, кушылып җырлагыз.
Бер табылгач югалтмагыз!
Бер генә бит безнең гомер!
Адашмагыз…» – дип теләгән җырчы иҗатын яратып күзәтеп баручыларга.
«Адашканнар» җырының сүзләрен Фирүзә Абдуллина, ә көен Гүзәлия Вәлиева иҗат иткән.