Бесланда әсирлектә булган кыз, күп еллардан соң, коткаручысын эзләп тапкан
Әлеге ир-ат бу адымын геройлыкка санамый, шуңа күрә үзен эзләүләренә битараф калган.
Бесланда террорчылар әсирлегендә калган кыз, бик күп еллар үткәч, үзен коткарган ир-атны эзләп тапкан. Бу хакта «Шоу-бизнес йолдызлары яңалыклары» инстабитендә язганнар.
2004 елның 1 сентябрендә Беслан мәктәбендә меңләгән кеше террорчылар әсирлегендә кала. Алар арасында 3 «Б» сыйныфы укучысы Регина да була. Аны, мәктәпне штурм белән алган вакытта, пулялар астыннан таныш булмаган ир-ат алып чыга. Регинаны кулларына күтәргән ирнең фотосы, очраклы рәвештә, әлеге куркыныч көн хроникасына эләгә. Бу фото Бесландагы террор актын сурәтләгән иң тетрәндергеч фотофактларның берсе.
Кызның гаиләсе коткаручыны бик озак эзләгән. Газетага игълан да биреп караганнар, хәтта. Ләкин батыр ир-ат табылмаган.
Узган ел Регина инстаграм сәхифәсенә әлеге авыр көннең хатирәсе булган фотоны урнаштыра. Озак та үтми, ул 11 яшьлек бер малайның: «Уңда минем әти һәм мин аның белән горурланам», - дип язган комментариен укып, тетрәнә.
Малайның Сослан исемле әтисе белән аралашкач, Регина аның әлеге адымын геройлыкка санамавын, шуңа күрә үзен эзләүләренә битараф калуын ачыклый.
Сослан фикеренчә, пуля астыннан сабыйларны коткару — һәр кешенең бурычы.